Бүтүн Арассыыйатааҕы бибилэтиэкэлэр күннэрин көрсө Национальнай бибилэтиэкэ «Кинигэ күүһэ» аахсыйаны сэттис сылын тэрийэн ыытар. Кэнники сылларга бу аахсыйаҕа Арассыыйа атын регионнарыттан кыттыылара элбээн иһэр. Тэрээһин сыала ааҕыыны көҕүлээһин, кинигэҕэ тапталы иҥэрии, бибилэтиэкэ үлэтигэр уопсастыбаннас болҕомтотун тардыы буолар. Нэһилиэккэ бас-көс, биллэр, бастыҥ уопсастыбанньыктар сөбүлүүр кинигэлэрин оҕолорго доргуччу ааҕан биэрэллэр. Ол курдук бу сырыыга ааҕааччыларынан олохтоох дьаһалтаттан экэнэмиис Розалия Тихонова, исписэлиис Туйаара Прокопьева уонна «Арассыыйа ийэлэрин» салайааччыта Любовь Осипова оҕо сылдьан сөбүлээн аахпыт кинигэлэриттэн доргуччу ааҕан биэрдилэр. Оҕолор бэркэ сэргээн иһиттилэр, ыйытыыларга эппиэттээтилэр, хоһооннорун аахтылар, саҥа кэлбит кинигэлэр быыстапкатын кытары билистилэр. Үгэс буолбут «Чохоон» тургутугун аастылар, манна биллэн туран элбэҕи ааҕар киһи элбэҕи билэр диэн өйдүүллэр. Түмүккэ аахсыйа кыттааччылара Национальнай бибилэтиэкэ бэлэмнээбит туоһу суругун тутан тарҕастылар.
