Кэмпэндээйигэ Арассыыйа күнүн киэҥ далааһыннаахтык көрүстүбүт.
«Сир уустара» кииҥҥэ кэлбит оҕолорго «Арассыыйа мин дойдум» диэн патриотическай квест оонньуу ыытылынна. Онтон «Сайдыы» култуура киинин былаһааккатыгар үлэһиттэр тэрийиилэринэн элбэх тэрээһин буолла, манна Арассыыйа күннэргэ анаммыт флешмоб үҥкүү, оҕолорго аналлаах араас күрэстэр, оонньуулар буоллулар. «Ураты сэлээппэ» оҥоруутун күрэҕэр 10 кыттааччы кытынна, бастыҥ сэлээппэлээх Аделина Максимова буолан бириис ылла. Хабылыкка, хаамыскаҕа, бадминтоҥҥа эмиэ күрэхтэстилэр. Олохтоох бибилэтиэкэ кинигэ быыстапкатын туруорда. Уонна Арассыыйа үрдүнэн ыытыллар турар «Декламируй» диэн аахсыйаны тэрийэн ыытта. Бу аахсыйа сыала нуучча улуу поэта Александр Пушкин айымньыларын дорҕоонноохтук ааҕыы буолар. Быйыл Арассыыйаҕа норуоттарын сомоҕоһууларын сылынан төрөөбүт тылынан Пушкин айымньыларын бырааһынньыкка кэлбит оҕолор, улахан дьоннор аахтылар. Манна киэҥ туттар биир дойдулаахпыт, саха норуодунай суруйааччыта Наталья Михалева тылбаастаабыт хоһооннорун элбэх киһи доргуччу аахта. «Арассыыйа ийэлэрин» түмсүүтэ сибэкки, оҕуруот аһын арассаадатын атыылаата.
Биир астык тэрээһин «Кыбытык» түмсүү «Кэмпэндээйи гербэтэ» диэн уустаан ураннаан тикпит панноларын сүрэхтээһинэ буолла. Нэһилиэкпит талааннаах далбар хотуттара бэйэлэригэр тиктибит кыбытык ойуулаах сэлиэттэрин, хаппардарын тутан үрдүк сыанаҕа кылбайа хаамтылар. Салайааччы Вера Семенова паннону хайдах тикпиттэрин билиһиннэрдэ. Гэрбэ туһунан сиһилии билиһиннэрдибит.
Кэлбит дьон бары «Кыбытыктар» үлэлэрин сөҕө-махтайа көрдүлэр.
