Кэмпэндээйи олохтоох бибилэтиэкэтэ уонна В. И. Иванов аатынан орто оскуола икки былаһаакканан бүтүн дойдубут үрдүнэн сыл аайы ыытыллар «Кыайыы дьыктаана» аахсыйаны ыыттыбыт.
Манна кэлбит дьону, үөрэнээччилэри олохтоох дьаһалта аатыттан Розалия Тихонова эҕэрдэлээтэ. «Бу аахсыйа бастатан туран эдэр ыччакка аналлаах. Билигин буола турар быһыы-майгы хайдах буола турарын бары билэбит. Аҕа дойду историятын токурутуу баар суол. Ыччаттар маннык тестэри толорон биллиннэр диэн ыытыллар. Бу дьыктаан боппуруостарын ааҕан биһиги бары даҕаны элбэҕи билиэхпит»- диэтэ. Онтон «Биир ньыгыл Арассыыйа» баартыйатын Кэмпэндээйитээҕи салаатын салайааччыта Туйара Прокопьева дьыктааны тэрийии туһунан эттэ:» Бу аахсыйа биһиги баартыйабыт көҕүлээһининэн 2019 сылтан ыытыллар. Сыл аайы хабаана кэҥээн иһэр. Бүгүн барыта 3500 былаһаакка үлэлиэҕэ. Аан дойду үрдүнэн ыытыллар, 75 араас тас дойдуга барыта 250 анал былаһаакка тэрилиннэ. Аахсыйаҕа атын элбэх уопсастыбаннай тэрилтэлэр кыттыыны ылаллар».
Нэһилиэккэ «Кыайыы дьыктаана» аахсыйаҕа барыта 24 киһи кыттыыны ылла, Саамай аҕам саастаах кыттааччы Валентина Николаевна Федотова, саамай эдэр, 9 кылаас үөрэнээччитэ Протодьяконова Ванесса буоллулар. Сорохтор эрдэ эппиэттэрин туттардылар, уопсайа 45 мүнүүтэ устата дьыктаан ыйытыктарга эппиэттээн туоһу суруктаах тарҕастылар.
